Farigh Bukhari
havas luuT liye shorish-e-tamanna ne
hari ruton ke liye ban ga.e hain divane
badalte der nahin lagti ab haqiqat ko
jo kal ki baten hain vo aaj ke hain afsane
hai ab to qat-e-ta.alluq ki ek hi surat
ḳhuda kare tu hamen dekh kar na pahchane
jo tere kuche se nikle to ik tamasha the
ajiib nazron se dekha hai ham ko duniya ne
safar men koi kisi ke liye Thaharta nahin
na muḌ ke dekha kabhi sahilon ko dariya ne
ḳhizan ne dast-e-basarat ko Das liya ‘farigh’
chale the qafla-e-fasl-e-gul ko Thahrane
Leave a Reply