kafan ki jeb bhi khali nahin hai
ye bad-hali hai khush-hali nahin hai
to kya ye phuul khud hi khil gaya tha
jo kahta hai koi maali nahin hai
unhen mat dekh khush rahne de un ko
tiri khatir ye divali nahin hai
tiri tasvir jhuti hai musavvir
mire shahron men hariyali nahin hai
vo ghar girne laga hai jis ki ham ne
abhi buniyad bhi daali nahin hai
to kya mujh ko saza dega vo jis ne
miri ik baat bhi taali nahin hai
tire baare men jab socha to dekha
ye raat aisi bhi ab kaali nahin hai
na kar ‘momin’ yahan koi tamasha
ye duniya dekhne vaali nahin hai
Leave a Reply