na to ham bahr se vaqif na suḳhan jante hain
kaise den lafzon ko tartib ye fan jante hain
vo kisi taur bhi tujh ko na laga.enge gale
ai ḳhushi jo bhi tira chal-chalan jante hain
dil ke mandir men hain do ek pujari aise
jo na puuja na ibadat na bhajan jante hain
is liye thaam ke rakkha hai junun ka daman
ai ḳhirad ham tira divaliya-pan jante hain
jo mohabbat ke hain alfaz mire honTon par
vo ta.assub ka tire chir-haran jante hain
paanv phailate hain itna ki hai jitni chadar
apni auqat hai kya ḳhuub apan jante hain
Leave a Reply