Thahar Jawed Ke Arman Dil-E-Muztar Nikalte Hain

Thahar jāved ke armāñ dil-e-muztar nikalte haiñ

khaḌe haiñ muntazir ham ghar se vo bāhar nikalte haiñ

asīrān-e-kuhan ma.atūb ho ho kar nikalte haiñ

ki zindāñ se janāze uThte haiñ bistar nikalte haiñ

nahīñ ma.alūm muñh se dil jigar kyūñkar nikalte haiñ

ham un se pūchh leñge chhoḌ ke jo ghar nikalte haiñ

ḳhabar letā nahīñ ġhurbat meñ koī pā-shikasta kī

jahāñ ham haiñ udhar se qāfile aksar nikalte haiñ

kabhī madfūñ hue the jis jagah par kushta-e-abrū

abhī tak is zamīñ se saikḌoñ ḳhanjar nikalte haiñ

har ik ma.ashūq ke daftar meñ ham maqtūl likhe haiñ

jahāñ dekho hamāre naam ke daftar nikalte haiñ

nahīñ hai ek harf-e-talḳh kī jaago mire dil meñ

magar pūchho to shikvoñ ke abhī daftar nikalte haiñ

javānī se takalluf baḌh gayā hai mere saaqī kā

sharāb-e-kohna aa.ī hai na.e sāġhar nikalte haiñ

hazāroñ mufside dar par bapā rahte haiñ ai qātil

tire kūche se lākhoñ fitna-e-mahshar nikalte haiñ

abhī fursat nahīñ ai ahl-e-mahshar sab farishtoñ ko

Thahar jaao mire a.amāl ke daftar nikalte haiñ

jo kar ke zabt saath ashkoñ ke haiñ aane nahīñ detā

sadā detā hai dil pahlū se ham bāhar nikalte haiñ

huā hai saḳht mushkil dafn honā tere vahshī kā

jahāñ par qabr khodī jaatī hai patthar nikalte haiñ

bahār aa.ī mubārak āshiq-o-māshūq ko milnā

ki kaliyāñ phūTtī haiñ bulbuloñ ke par nikalte haiñ

sivā qalb-o-jigar ke mumlikat meñ ishq kī kyā hai

agar DhūñDho to ye ujḌe hue do ghar nikalte haiñ

nazar ke ḳhauf se katrī ga.iiñ haiñ in kī vaañ palkeñ

mirī rag rag se yaañ TuuTe hue nashtar nikalte haiñ

samajh ke jin ko jugnū bāñdhte ho apne dāman meñ

sharar ye shab ko mere dil se ai dilbar nikalte haiñ

nishāñ qalb-o-jigar kā āñsuoñ se saaf kyā pā.ūñ

ki vo to kashtiyāñ Duubī haiñ sau lañgar nikalte haiñ

kashīda un ke abrū haiñ nigāheñ tez hotī haiñ

kamāneñ khiñch rahī haiñ miyān se ḳhanjar nikalte haiñ

jigar dil aate haiñ āñkhoñ se bāhar jam.a haiñ aañsū

ki apne mulk se sultāñ ma-e-lashkar nikalte haiñ

ḳhayāl itnā to hai tere gale kā haar huuñ shāyad

gul-e-tar baaġh se hañste hue bāhar nikalte haiñ

jahannam se koī kah de zarā hoshiyār ho jaa.e

ġhazab kā vaqt hai qabroñ se dāman tar nikalte haiñ

tavaqqo uTh ga.ī aane kī bilkul yuuñ uThāyā hai

ki aaj un kī galī se ham ma-e-bistar nikalte haiñ

karūñ kyūñkar na tāzīm us kī maiñ laa.e jo ḳhat us kā

ki aksar is tarah ke log paiġhambar nikalte haiñ

qafas meñ ham-safīrān-e-chaman kyuuñ chhoḌe jaate ho

zarā do din Thahar jaao hamāre par nikalte haiñ

jigar-dārī kā da.avā miT gayā har shaḳhs kahtā hai

jo donoñ haath ham rakkhe hue dil par nikalte haiñ

‘rashīd’ āġhāz-e-ulfat se kahīñ anjām behtar hai

ki bahr-e-ishq ke Duube lab-e-kausar nikalte haiñ

Leave a Comment