Rasheed Lakhnavi
Thahar javed ke arman dil-e-muztar nikalte hain
khaḌe hain muntazir ham ghar se vo bahar nikalte hain
asiran-e-kuhan ma.atub ho ho kar nikalte hain
ki zindan se janaze uThte hain bistar nikalte hain
nahin ma.alum munh se dil jigar kyunkar nikalte hain
ham un se puchh lenge chhoḌ ke jo ghar nikalte hain
ḳhabar leta nahin ghurbat men koi pa-shikasta ki
jahan ham hain udhar se qafile aksar nikalte hain
kabhi madfun hue the jis jagah par kushta-e-abru
abhi tak is zamin se saikḌon ḳhanjar nikalte hain
har ik ma.ashuq ke daftar men ham maqtul likhe hain
jahan dekho hamare naam ke daftar nikalte hain
nahin hai ek harf-e-talḳh ki jaago mire dil men
magar puchho to shikvon ke abhi daftar nikalte hain
javani se takalluf baḌh gaya hai mere saaqi ka
sharab-e-kohna aa.i hai na.e saghar nikalte hain
hazaron mufside dar par bapa rahte hain ai qatil
tire kuche se lakhon fitna-e-mahshar nikalte hain
abhi fursat nahin ai ahl-e-mahshar sab farishton ko
Thahar jaao mire a.amal ke daftar nikalte hain
jo kar ke zabt saath ashkon ke hain aane nahin deta
sada deta hai dil pahlu se ham bahar nikalte hain
hua hai saḳht mushkil dafn hona tere vahshi ka
jahan par qabr khodi jaati hai patthar nikalte hain
bahar aa.i mubarak ashiq-o-mashuq ko milna
ki kaliyan phuTti hain bulbulon ke par nikalte hain
siva qalb-o-jigar ke mumlikat men ishq ki kya hai
agar DhunDho to ye ujḌe hue do ghar nikalte hain
nazar ke ḳhauf se katri ga.iin hain in ki vaan palken
miri rag rag se yaan TuuTe hue nashtar nikalte hain
samajh ke jin ko jugnu bandhte ho apne daman men
sharar ye shab ko mere dil se ai dilbar nikalte hain
nishan qalb-o-jigar ka ansuon se saaf kya pa.un
ki vo to kashtiyan Duubi hain sau langar nikalte hain
kashida un ke abru hain nigahen tez hoti hain
kamanen khinch rahi hain miyan se ḳhanjar nikalte hain
jigar dil aate hain ankhon se bahar jam.a hain aansu
ki apne mulk se sultan ma-e-lashkar nikalte hain
ḳhayal itna to hai tere gale ka haar huun shayad
gul-e-tar baagh se hanste hue bahar nikalte hain
jahannam se koi kah de zara hoshiyar ho jaa.e
ghazab ka vaqt hai qabron se daman tar nikalte hain
tavaqqo uTh ga.i aane ki bilkul yuun uThaya hai
ki aaj un ki gali se ham ma-e-bistar nikalte hain
karun kyunkar na tazim us ki main laa.e jo ḳhat us ka
ki aksar is tarah ke log paighambar nikalte hain
qafas men ham-safiran-e-chaman kyuun chhoḌe jaate ho
zara do din Thahar jaao hamare par nikalte hain
jigar-dari ka da.ava miT gaya har shaḳhs kahta hai
jo donon haath ham rakkhe hue dil par nikalte hain
‘rashid’ aghaz-e-ulfat se kahin anjam behtar hai
ki bahr-e-ishq ke Duube lab-e-kausar nikalte hain
Leave a Reply