Doston Ko Meri Zarurat Hai

dostoñ ko mirī zarūrat hai

qadr-dānī nahīñ ye qīmat hai

aadmī bār-e-ādamiyat hai

hādse kī ashad zarūrat hai

un ke lab haiñ mirī shikāyat hai

kitnā badlā hai vaqt-e-hairat hai

do diloñ ke milāp kī ḳhvāhish

pahle ḳhvāhish thī ab nadāmat hai

maiñ jahāñ huuñ kafīl huuñ apnā

tum jahāñ ho mirī zarūrat hai

ādamiyat kā irtiqā maiñ huuñ

aadmī se mujhe mohabbat hai

aao ik dūsre ko pyaar kareñ

pyaar karnā baḌī ibādat hai

Leave a Comment