gham itne apne daman-e-dil se lipaT ga.e
tujh se bichhaḌ ke ham ka.i qiston men baT ga.e
kyuun ye dayar mere liye tang sa laga
kya baat hai ki daman-e-sahra simaT ga.e
is se kahin bhi naam tumhara nahin mila
ham har varaq kitab-e-vafa ke palaT ga.e
tum ghair se nibhao vafa ham ko bhuul kar
jaao tumhari raah se ham aaj haT ga.e
ab jhelna paḌega azab-e-gunah-e-ishq
us but-numa ḳhuda ke irade palaT ga.e
jab se mata-e-dard mili mujh ko ai ‘zafar’
qad mere samne mire yaron ke ghaT ga.e
Leave a Reply