Asrarul Haq Asrar
na.e libas ko ham tar-tar kya karte
mili thi bhiik men fasl-e-bahar kya karte
ham apne zaḳhm-e-tamanna shumar kya karte
tamam umr yahi karobar kya karte
jab aftab ka.i apni dastaras men rahe
tumhin kaho ki charaghon se pyaar kya karte
hamare haath men patthar the phal girane ko
ham andhiy.on ka bhala intizar kya karte
kabhi ham apni vafaon se mutma.in na hue
nigah-e-yar tujhe sharmsar kya karte
hamara dard bhi kuchh tum se muḳhtalif to na tha
ham ahl-e-zarf the chiḳh-o-pukar kya karte
unhen bhi apni ḳhushi thi aziiz ai ‘asrar’
jo mera dil na dukhate to yaar kya karte
Leave a Reply