purane daanv par har din nae aansu lagata hai
vo ab bhi ik phate rumal par khushbu lagata hai
use kah do ki ye unchaiyan mushkil se milti hain
vo suraj ke safar men mom ke baazu lagata hai
main kaali raat ke tezab se suraj banata huun
miri chadar men ye paivand ik jugnu lagata hai
yahan lachhman ki rekha hai na siita hai magar phir bhi
bahut phere hamare ghar ke ik sadhu lagata hai
namazen mustaqil pahchan ban jaati hai chehron ki
tilak jis tarah mathe par koi hindu lagata hai
na jaane ye anokha farq is men kis tarah aaya
vo ab collar men phulon ki jagah bichchhu lagata hai
andhere aur ujale men ye samjhauta zaruri hai
nishane ham lagate hain thikane tu lagata hai