Is Par Jahan-E-Raftagan Hai

is paar jahān-e-raftagāñ hai

ik dard kī raat darmiyāñ hai

āñkheñ haiñ ki rahguzār-e-sailāb

aur dil hai ki Dūbtā makāñ hai

achchhā hai ki sirf ishq kiije

ye umr to yuuñ bhī rā.egāñ hai

kis yaad kī chāñdnī hai dil meñ

ik lahr sī ḳhuun meñ ravāñ hai

yaad aayā vahāñ gire the aañsū

ab sabza o gul jahāñ jahāñ hai

har lahza badal rahī hai duniyā

ai husn-e-sabāt tū kahāñ hai

dukh jhelo to jī kaḌā hī rakhnā

dil hai to hisāb-e-dostāñ hai

Leave a Comment