vo bahut ḳhush hai ḳhitabat-o-mura.at ke saath
ḳhuub badla vo badalte hue halat ke saath
dil ke nazdik pare aankh se rahne vaale
kya ta.alluq hai tiri yaad ka barsat ke saath
meri ḳhvahish ka zara bhi na rakha paas us ne
mujh ko lauTa diya ḳhat chand hidayat ke saath
nik.hat-o-nur-o-ziya husn ki pahchan bane
ishq mansub hua bam-e-ḳharabat ke saath
main ne lauTa diye saughat-o-taha.if us ke
mujh ko manzur na thi shart inayat ke saath
Leave a Reply