Na Mohtasib Ki Na Hur-O-Jinan Ki Baat Karo

Abdul Majeed Salik

na mohtasib ki na hur-o-jinan ki baat karo

mai-e-kuhan ki nigar-e-javan ki baat karo

kisi ki tabish-e-rukhsar ka kaho qissa

kisi ke gesu-e-ambar-fishan ki baat karo

ziya hai shahid-o-shama-o-sharab se us ki

farogh-e-mahfil-e-ruhaniyan ki baat karo

jo muddaa ho kisi qibla-e-murad ka zikr

to astana-e-pir-e-mughan ki baat karo

nahin hua jo tulua aftab to filhal

qamar ki baat karo kahkashan ki baat karo

rahega mashghala-e-yad-e-raftgan kab tak

guzar raha hai jo us karvan ki baat karo

ye qaid-o-said ke andesha-ha-e-be-ja kya

chaman ki fikr karo ashiyan ki baat karo

yahi jahan hai hangama-zar-e-sud-o-ziyan

isi ke suud isi ke ziyan ki baat karo

ab is chaman men na sayyad hai na gulchin hai

karo to ab sitam-e-baghban ki baat karo

khuda ke zikr ka mauqa nahin yahan ‘salik’

dayar-e-hind men husn-e-butan ki baat karo