faḳhta shaḳh se uḌte hue ghabra.i thi
jab parindon ke bilakne ki sada aa.i thi
aable meri zaban par hain to hairat kaisi
main ne ik baar tiri jhuTi qasam khaa.i thi
kab ye socha tha barabar se guzar ja.ega
meri jis shaḳhs se barson ki shanasa.i thi
ab vo kahta hai ki zanjir bani mere liye
us ke pairon men jo paa.el kabhi pahna.i thi
vaqt badle to har ik rishta badalta hai ‘hasan’
dil men divar kahan pahle mire bhaa.i thi
Leave a Reply