jo un se kaho vo yaqin jante hain
vo aise hain kuchh bhi nahin jante hain
bade jannati hain ye mai-khvar zahid
mai-e-talkh ko angbin jante hain
javani khud aati hai sau husn le kar
javan koi ho ham hasin jante hain
shab-e-mah banti hai har shab mire ghar
ye sab bada-vash mah-jabin jante hain
banavat bhi ik fan hai jo janta ho
tiri sadgi kuchh hamin jante hain
nigahen na ankhon ke ghunghat se niklen
adaen ghazab sharmgin jante hain
tiri kam-nigahi se ubhre hain fitne
tujhe ghair chin-bar-jabin jante hain
miri jaan par raat ban ban gai hai
mira haal kuchh ham-nashin jante hain
jo vaqif nahin lutf-e-tajdid se kuchh
vo tauba ki lazzat nahin jante hain
vo sharmili ankhen vo sharmili baten
vo hansna bhi khul kar nahin jante hain
miri but-parasti bhi hai haq-parasti
mira martaba ahl-e-din jante hain
bade paak tinat bade saaf batin
‘riyaz’ aap ko kuchh hamin jante hain
Leave a Reply