faiz-ahmad-faiz

Ek Rah-Guzar Par

vo jis ki diid men lakhon masarraten pinhan

vo hasan jis ki tamanna main jannaten pinhan

hazar fitne tah-e-pa-e-naz khak-nashin

har ik nigah khumar-e-shabab se rangin

shabab jis se takhayyul pe bijliyan barsen

vaqar jis ki rafaqat ko shokhiyan tarsen

ada-e-laghzish-e-pa par qayamaten qurban

bayaz-rukh pe sahar ki sabahaten qurban

siyah zulfon men varafta nikhaton ka hujum

tavil raton ki khvabida rahaton ka hujum

vo aankh jis ke banav pa khaliq itrae

zaban-e-sher ko tarif karte sharm aae

vo hont faiz se jin ke bahar lala-farosh

bahisht o kausar o tasnim o salsabil ba-dosh

gudaz jism qaba jis pe saj ke naaz kare

daraz qad jise sarv-e-sahi namaz kare

gharaz vo husn jo mohtaj-e-vasf-o-nam nahin

vo hasan jis ka tasavvur bashar ka kaam nahin

kisi zamane men is rah-guzar se guzra tha

ba-sad ghurur o tajammul idhar se guzra tha

aur ab ye rah-guzar bhi hai dil-fareb o hasin

hai is ki khaak men kaif-e-sharab-o-sher makin

hava men shokhi-e-raftar ki adaen hain

faza men narmi-e-guftar ki sadaen hain

gharaz vo husn ab is rah ka juzv-e-manzar hai

niyaz-e-ishq ko ik sajda-gah mayassar hai

More Poems

Leave a Comment