Aziz Nabeel
ye kis maqam pe laaya gaya ḳhudaya mujhe
ki aaj raund ke guzra hai mera saaya mujhe
main jaise vaqt ke hathon men ik ḳhazana tha
kisi ne kho diya mujh ko kisi ne paaya mujhe
na jaane kaun huun kis lamha-e-talab men huun
‘nabil’ chain se jiina kabhi na aaya mujhe
main ek lamha tha aur niind ke hisar men tha
phir ek roz kisi ḳhvab ne jagaya mujhe
usi zamin ne sitara kiya hai mera vajud
samajh rahe hain zamin vaale kyuun paraya mujhe
jahan ki sadiyon ki ḳhamoshiyan sulagti hain
kisi ḳhayal ki vahshat ne gungunaya mujhe
ik aarzu ke ta.aqub men yuun hua hai ‘nabil’
hava ne ret ki palkon pe la biThaya mujhe
Leave a Reply