Aleem Usmani
charagh shaam se aḳhir jala.en kis ke liye
koi na aa.ega ankhen bichha.en kis ke liye
khincha khincha nazar aata hai ham se har anchal
sitare toḌ ke laa.en to laa.en kis ke liye
nahin hai koi hamen zindagi ka shauq magar
ham apni jaan se jaa.en to jaa.en kis ke liye
sitam uThane ka maqsad bhi koi hota hai
ham asman se sharten laga.en kis ke liye
ḳhilaf ham nahin aḳhtar-shumariyon ke magar
saval ye hai ki ninden ganva.en kis ke liye
vafa ik aag hai bachchon ka koi khel nahin
ham apna muft men daman jala.en kis ke liye
sharab ham pe hamesha se hai haram ‘alim’
pata nahin ye uThi hain ghaTa.en kis ke liye
Leave a Reply