zindagi jis ka naam hai yaaro
qissa-e-na-tamam hai yaaro
aadmi ko davam ho ki na ho
adamiyat davam hai yaaro
khilte jaate hain phuul rahon men
kaun mahv-e-ḳhiram hai yaaro
zindagi ka koi maqam nahin
zindagi ḳhud maqam hai yaaro
ek vaqti surur-e-bulhavasi
ishq kaif-e-davam hai yaaro
kar-e-yazdan jise samajhte ho
vo tumhara hi kaam hai yaaro
magar duniya ba-maslahat bhi ghalat
diin isi ka to naam hai yaaro
zindagi mera saath de ki na de
maut mujh par haram hai yaaro
azm mazbut hausle mohkam
vaqt kis shai ka naam hai yaaro
fikr-e-‘anjum’ ko sha.iri na kaho
ek ghaibi payam hai yaaro
Leave a Reply