mumkin mujhe jo ho be-riya ho
masnad ho ki is men boriya ho
jab qabil-e-did dil-ruba ho
allah kare ki ba-vafa ho
bheja nahin khat-e-shauq kab se
maalum hua ki tum khafa ho
be-tabi-e-dil agar dikhaun
koi na kisi ka mubtala ho
marta hai zar pe ahl-e-duniya
namard ko kab khvahish-e-tila ho
mitti kar de jo aap ko to
nazron men khaak kimiya ho
aai hai fasl-e-gul chaman men
ai hosh-o-khirad chalo hava ho
kya mujhe dar-ba-dar phiraya
ai khvahish-e-dil tira bura ho
dikhlai tu ne yaar ki shakl
ai jazba-e-dil tira bhala ho
lipto mujhe aa ke hijr ki shab
ai gesu-e-yar agar bala ho
ai ‘muntahi’ bazm-e-yar ka haal
kya janiye baad mere kya ho
Leave a Reply