Kashish-e-Husn Ki Ye Anjuman-Arai Hai

Ahsan Marahravi

kashish-e-husn ki ye anjuman-arai hai

saari duniya tire kuche men simaT aai hai

dard ne khoe hue dil ki jagah paai hai

ik bala sar se gai ek bala aai hai

jaan nisaron ko sahara jo na jiine ka mila

ku-e-qatil men qaza khinch ke le aai hai

main chhupata huun gham-e-ishq to banta nahin kaam

aur kahta huun to goya miri rusvai hai

jigar o dil men tarazu na ho kyuun navak-e-naz

is ko donon se barabar ki shanasai hai

dil ye kahta hai vahan ja ke sambhal ja.unga

main ye kahta huun ki bad-baḳht ki maut aai hai

ban ke naseh vo ye kahte hain mohabbat na karo

mujh ko marne nahin dete ye masihai hai

sab jise dagh-e-dil o zaḳhm-e-jigar kahte hain

vo mire naḳhun-e-gham ki chaman-arai hai

kya hai duniya men numud aur numaish ke siva

zindagi ham ko tamashe ke liye laai hai

ishq rusva-kun-e-alam vo hai ‘ahsan’ jis se

nek-namon ki bhi bad-nami o rusvai hai