ab chaman-zar hi apna hai na sahra apna
kal har ik shakh pe mumkin tha basera apna
bam-o-dar tak na rahe ghar ke to ghar kya apna
ab falak bhi na hata le kahin saaya apna
umr bhar jis ne zamane ki masihai ki
ban saka apne hi gham main na masiha apna
kis ke ghar jaun kise aaj main apna samjhun
apne ghar hi men nahin koi shanasa apna
phir kasi mod pe ik roz pukaroge mujhe
chahe ab tod do dil se mire rishta apna
tum hamen harf-e-ghalat kah ke mita bhi na sake
ab bhi har lab pe sar-e-bazm hai charcha apna
shaam ho jaegi ik roz to chalte chalte
saath lete chalen ham aaj ujala apna
saath sab chhod gae rah-e-mohabbat men ‘hayat’
sarf ik saath raha naqsh-e-kaf-e-pa apna