Meri Aankhon Se Zahir Khun-Fishani Ab Bhi Hoti Hai

miri ankhon se zahir khun-fishani ab bhi hoti hai

nigahon se bayan dil ki kahani ab bhi hoti hai

surur-ara sharab-e-arghavani ab bhi hoti hai

mire qadmon men duniya ki javani ab bhi hoti hai

koi jhonka to laati ai nasim atraf-e-kanan tak

savad-e-misr men ambar-fishani ab bhi hoti hai

vo shab ko mushk-bu pardon men chhup kar aa hi jaate hain

mire khvabon par un ki mehrbani ab bhi hoti hai

kahin se haath aa jaae to ham ko bhi koi la de

suna hai is jahan men shadmani ab bhi hoti hai

hilal o badr ke naqshe sabaq dete hain insan ko

ki nakami bina-e-kamrani ab bhi hoti hai

kahin aghyar ke khvabon men chhup chhup kar na jaate hon

vo pahlu men hain lekin bad-gumani ab bhi hoti hai

samajhta hai shikast-e-tauba ashk-e-tauba ko zahid

miri ankhon ki rangat arghavani ab bhi hoti hai

vo barsaten vo baten vo mulaqaten kahan hamdam

vatan ki raat hone ko suhani ab bhi hoti hai

khafa hain phir bhi aa kar chhed jaate hain tasavvur men

hamare haal par kuchh mehrbani ab bhi hoti hai

zaban hi men na ho tasir to main kya karun naseh

tiri baton se paida sargirani ab bhi hoti hai

tumhare gesuon ki chhanv men ik raat guzri thi

sitaron ki zaban par ye kahani ab bhi hoti hai

pas-e-tauba bhi pi lete hain jam-e-ghuncha-o-gul se

baharon men junun ki mehmani ab bhi hoti hai

koi khush ho miri mayusiyan fariyad karti hain

ilahi kya jahan men shadmani ab bhi hoti hai

buton ko kar diya tha jis ne majbur-e-sukhan ‘akhtar’

labon par vo nava-e-asmani ab bhi hoti hai

Leave a Comment