hijr ke daur men halat badal jaate hain
phuul mar jaate hain sab paat badal jaate hain
tu ne dekha hai kabhi dard ke sahraon men
dhuup baḌhne lage tab saath badal jaate hain
ham pe vo vaqt hai ab chahe ḳhushi aa.e ki gham
aankh nam hoti hai jazbat badal jaate hain
main ne logon ko bhi mausam ka muqallid paaya
baat hoti hi nahin haath badal jaate hain
tum abhi aa.e ho tum baanT lo chahat ke varaq
vaqt ke saath ḳhayalat badal jaate hain
pahle tha bhuuk ka Dar ab hai rida ḳhatre men
kya ḳhabar thi hamen ḳhatrat badal jaate hain
ye to fitrat hai bura in ko na kahna ‘shakir’
tu ne dekha nahin din raat badal jaate hain
Leave a Reply