ḳhubi ka teri bas-ki ik aalam gavah hai
apni baghair dekhe hi halat tabah hai
aalam suna jo naaz ka hai us se al-aman
andaz-e-guftugu se ḳhuda ki panah hai
tevri ke Dhab hain aur nigah ke hazar Dol
chitvan ke laakh rang gharaz vaah vaah hai
naḳhun ye dil hilal hai abru ke rashk se
mukhḌe ka daagh rakhta kaleje pe maah hai
ḳhun-rez teri chashm ko batlate hain vale
chitvan men saath kahte hain phir uzr-ḳhvah hai
ḳhubi ka tere balon ki mazkur hai jahan
sumbul ka naam is jagah ik ru-siyah hai
deta hai teri qamat-e-dil-ju ka jo pata
be-saḳhta vo khinchta ik dil se aah hai
go ‘lutf’-e-ḳhufta-baḳht ke aao na ḳhvab men
lekin tire ḳhayal ko nit dil men raah hai
Leave a Reply