Aslam Ansari
vo rang uḌe hain kuchh ab ke baras baharon ke
ki dil men naqsh ubharte hain barf-zaron ke
ye dasht-e-dil ye ba-har-su ghubar-e-tanha.i
kahan ga.e vo chaman ajnabi isharon ke
ulajh ga.e hain kisi mauj-e-iztirab men phir
vo ḳhvab rang men Duube hue kinaron ke
chalo ki us se koi saaf saaf baat karen
ki ab to khul hi ga.e bhed isti.aron ke
na jaane aḳhir-e-shab kis ke dil pe choT paḌi
ki Duub Duub ga.e jaise dil sitaron ke
firaqe-e-gul men kaTi zindagi ḳhizaon ki
suragh-e-gul men luTe qafile baharon ke
Leave a Reply