Na Chhed Zahid-E-Nadan Sharab Pine De

na chhed zahid-e-nadan sharab piine de

sharab piine de khana-kharab piine de

abhi se apni nasihat ka zahar de na mujhe

abhi to piine de aur be-hisab piine de

main janta huun chhalakta hua gunah hai ye

tu is gunah ko be-ehtisab piine de

phir aisa vaqt kahan ham kahan sharab kahan

tilism-e-dahr hai naqsh-e-bar-ab piine de

mire dimagh ki duniya ka aftab hai ye

mila ke barf men ye aftab piine de

kisi hasina ke boson ke qabil ab na rahe

to in labon se hamesha sharab piine de

samajh ke us ko ghafur-ur-rahim piita huun

na chhed zikr-e-azab-o-savab piine de

jo ruuh ho chuki ik baar dagh-dar miri

to aur hone de lekin sharab piine de

sharab-khane men ye shor kyuun machaya hai

khamosh ‘akhtar’-e-khana-kharab piine de

Leave a Comment