haris-e-khvahish-e-laal-o-guhar nahin hui main
mohabbaton men talabgar-e-zar nahin hui main
tira khayal raha dil ki dhadkanon ke qarin
so tere gham se kabhi be-khabar nahin hui main
sajaya khud ko vafa ke singhar se main ne
isi sabab se kabhi be-hunar nahin hui main
kisi ko kaise batati main manzilon ka pata
jab apne saath sharik-e-safar nahin hui main
khuda-e-husn-azal ne mujhe navaza hai
khumar-e-ishq se sarf-e-nazar nahin hui main
hai us ka daava ki main us ki zindagi huun ‘naz’
vo kya karega kisi din agar nahin hui main
Leave a Reply