Kishwar Naheed
tumhari yaad men ham jashn-e-gham manaen bhi
kisi tarah se magar tum ko yaad aaen bhi
chhalak hi padte hain khud hi gulab ankhon ke
vo paas aaen to ye dastan sunain bhi
har ek lamha yahi bekali si hai dil men
ki un ko yaad karen un ko bhuul jaaen bhi
javan gehun ke kheton ko dekh kar ro den
vo ladkiyan ki jinhen bhuul baithin maaen bhi
tamam umr yunhi ratjagon se kya hasil
unhen bhulaen zara niind ko bulaen bhi
sukun milta hai jalti hui dopahron men
bani hain marham-e-dil dhuup ki shuaen bhi
rava-ravi men hai har ek sohbat-e-yaran
milen sakun se to qisse tire sunaen bhi
vo jin ke zikr se ‘nahid’ zindagi hai hasin
vo log aaen to ankhon pe ham bithaen bhi
Leave a Reply