Raza Hamdani
zaḳhm kuchh aise mire qalb-o-jigar ne paa.e
umr bhar jo kisi unvan na bharne paa.e
ham ne ashkon ke charaghon se saja liin palken
ki tire dard ki barat guzarne paa.e
us se kya puchhte ho falsafa-e-maut-o-hayat
ki jo zinda bhi rahe aur na marne paa.e
is liye kam-nazari ka bhi sitam sahna paḌa
tujh pe mahfil men koi naam na dharne paa.e
pas-e-adab-e-vafa tha ki shikasta-pa.i
be-ḳhudi men bhi na ham had se guzarne paa.e
apne jazbat ke biphre hue tufan men ‘raza’
is tarah Duube ki phir ham na ubharne paa.e
Leave a Reply