har ek saans hi ham par haram ho ga.i hai
ye zindagi to koi intiqam ho ga.i hai
jab aa.i maut to rahat ki saans li ham ne
ki saans lene ki zahmat tamam ho ga.i hai
kisi se guftugu karne ko ji nahin karta
miri ḳhamoshi hi mera kalam ho ga.i hai
parinde hote to Daali pe lauT bhi jaate
hamen na yaad dilao ki shaam ho ga.i hai
idhar to roz ke marne se hi nahin fursat
udhar vo zindagi fursat ka kaam ho ga.i hai
hazaron ansuon ke ba.ad ik zara si hansi
kisi gharib ki mehnat ka daam ho ga.i hai
bana na paa.i kabhi adaton ko apna ghulam
ye zindagi to ḳhud un ki ghulam ho ga.i hai
purani yadon ne jab bhi laga liya phera
is ujḌe dil men baḌi dhum-dham ho ga.i hai
Leave a Reply