har dhaḌkan haijani thi har ḳhamoshi tufani thi
phir bhi mohabbat sirf musalsal milne ki asani thi
jis din us se baat hui thi us din bhi be-kaif tha main
jis din us ka ḳhat aaya hai us din bhi virani thi
jab us ne mujh se ye kaha tha ishq rifaqat hi to nahin
tab main ne har shaḳhs ki surat mushkil se pahchani thi
jis din vo milne aa.i hai us din ki rudad ye hai
us ka blouse naranji tha us ki saari dhani thi
uljhan si hone lagti thi mujh ko akasr aur vo yuun
mera mizaj-e-ishq tha shahri us ki vafa dahqani thi
ab to us ke baare men tum jo chaho vo kah Daalo
vo angḌa.i mere kamre tak to baḌi ruhani thi
naam pe ham qurban the us ke lekin phir ye taur hua
us ko dekh ke ruk jaana bhi sab se baḌi qurbani thi
mujh se bichhaḌ kar bhi vo laḌki kitni ḳhush ḳhush rahti hai
us laḌki ne mujh se bichhaḌ kar mar jaane ki Thani thi
ishq ki halat kuchh bhi nahin thi baat baḌhane ka fan tha
lamhe la-fani Thahre the qatron ki tughyani thi
jis ko ḳhud main ne bhi apni ruuh ka irfan samjha tha
vo to shayad mere pyase honTon ki shaitani thi
tha darbar-e-kalan bhi us ka naubat-ḳhana us ka tha
thi mere dil ki jo raani amrohe ki raani thi
Leave a Reply