kasrat-e-vahdaniyat men husn ki tanvir dekh
dida-e-haq-bin se rang-e-alam-e-tasvir dekh
is qadar khinchna nahin achchha but-e-be-pir dekh
pyaar ki nazron se su-e-ashiq-e-dil-gir dekh
ghair ne mujh par sitam Dhaa.e hain Dhale aaj tu
rah na jaa.e koi bhi tarkash men baaqi tiir dekh
kaam ban ban kar bigaḌ jaate hain lakhon raat din
kis qadar hai mujh se bargashta miri taqdir dekh
phir na ye kahna ki ḳhat likkha hai kis ne ghair ko
le ye hai maujud tere haath ki tahrir dekh
harna himmat dalil-e-kamyabi se hai duur
kaam le tadbir se phir ḳhubi-e-taqdir dekh
gumbad-e-gardun sambhal ai gumbad-e-gardun sambhal
kar na de sad paash tir-e-ah par tasir dekh
chaar din ki zindagi par musht-e-ḳhak itna ghurur
piis dega ek din ye asman-e-pir dekh
be-bula.e to nahin aaya tiri mahfil men ‘naz’
dekh haan haan dekh apne haath ki tahrir dekh
Leave a Reply