Ban Gaya Hai Jism Guzre Qafilon Ki Gard Sa

ban gaya hai jism guzre qafilon ki gard sa

kitna viran kar gaya mujh ko mira hamdard sa

kya abhi tak us ka rasta rokti hai koi soch

mere hathon men hai us ka haath lekin sard sa

is tarah ghul-mil gaya aa kar na.e mahaul men

vo bhi ab lagta hai mere ghar ka hi ik fard sa

jazb tha jaise koi suraj hi us ke jism men

duur se vo sang lagta tha ba-zahir sard sa

aaj tak ankhon men hai manzar bichhaḌne ka ‘nasim’

pairahan mela sa us ka aur chehra zard sa