mustaqil mahv-e-gham-e-ahd-e-guzishta hona
aise hone se to behtar hai na dil ka hona
main huun insan mujhe insan hi rahne diije
mat sikha.en mujhe har gaam farishta hona
dekhni paḌti hain har moḌ pe udhḌi lashen
kitna dushvar hai is shahar men biina hona
ai musavvir zara tasvir men manzar ye utaar
do kinaron ko hai dekha gaya yakja hona
hain faraham mujhe be-rah-ravi ke asbab
zeb dega mujhe avara-e-duniya hona
bastiyan shahr-e-ḳhamoshan ki tarah hain abad
zinda logon ko lubhane laga murda hona
ai pari-zad tire hijr men ye ham pe khula
maut se ziyada alam-baḳhsh hai tanha hona
ḳhud hi gir ja.egi zindan-e-badan ki divar
ruh-e-afsurda ko bechain bhala kya hona
kha gaya raunaqen paivand-o-marasim ki ‘nadim’
jins-e-iḳhlas ka bazar men sasta hona
Leave a Reply