Bedam Shah Warsi

Mujhse Chhup Kar Mere Armanon Ko Barbaad Na Kar

mujh se chhup kar mire armanon ko barbad na kar

dad-khvahi ke liye aaya huun bedad na kar

dekh mit jaega hasti se guzar jaega

dil-e-na-aqebat-andesh unhen yaad na kar

aa gaya ab to mujhe lutf-e-asiri sayyad

zab.h kar Daal magar qaid se azad na kar

jis pe marta huun use dekh to luun ji bhar ke

itni jaldi tu mire qatl men jallad na kar

aap to zulm lagatar kae jaate hain

mujh se takid pe takid hai fariyad na kar

jalva dikhla ke mira luut liya sabr-o-qarar

phir ye kahte hain ki tu nala-o-fariyad na kar

aap hi apni jafaon pe pasheman hain vo

un ko mahjub ziyada dil-e-nashad na kar

ai saba kucha-e-janan men pada rahne de

khaak ham khak-nashinon ki to barbad na kar

ham to jab samjhen ki haan dil pe hai qaabu ‘bedam’

vo tujhe bhuul gae tu bhi unhen yaad na kar

More Poems

Leave a Comment