Bashir Badr
sar se pa tak vo gulabon ka shajar lagta hai
ba-vazu ho ke bhi chhute hue Dar lagta hai
main tire saath sitaron se guzar sakta huun
kitna asan mohabbat ka safar lagta hai
mujh men rahta hai koi dushman-e-jani mera
ḳhud se tanha.i men milte hue Dar lagta hai
but bhi rakkhe hain namazen bhi ada hoti hain
dil mera dil nahin allah ka ghar lagta hai
zindagi tu ne mujhe qabr se kam di hai zamin
paanv phaila.un to divar men sar lagta hai
Leave a Reply