miri mohabbat ki be-ḳhudi ko talash-e-haqq-e-jalal dena
kabhi jo pabanda-e-sitam huun mujhe bhi azm-e-maqal dena
mohabbaton ki ye shoḳhiyan hain ye e’timad-e-vafa hai mera
bigaḌ ke fihrist-e-ashiqan se kahin na mujh ko nikal dena
rah-e-mohabbat ki saḳhtiyon se jo rang-e-ruḳh tha jhulas chuka hai
tumhari ulfat pe mar rahe hain mira bhi chehra ujaal dena
tumhara sab ham ko jante hain to apni izzat ki laaj rakh ke
hamari hasti ke aa.ine ko koi hunar kuchh kamal dena
tumhi to ho miir mai-kade ke tumhi ho saqi-e-tishna-kami
ham apna saghar liye khaḌe hain zara si is men bhi Dhaal dena
suni hain fayyaziyan tumhari tumhare maston men hai ye shohrat
hai mere saaqi ka ye vatira ki jaam bhar kar ubaal dena
pasand hain tum ko bhigi ankhen larazte lab aur udaas chehre
visal ka jab irada karna mujhe bhi rang-e-malal dena
Leave a Reply