kuchh to mushkil men kaam aate hain
kuchh faqat mushkilen baḌhate hain
apne ehsan jo jatate hain
apna hi martaba ghaTate hain
sabr se intizar karna siikh
achchhe din aate aate aate hain
faslon se gurez kya karna
fasle qurbaten baḌhate hain
kuchh to bar-e-nazar bhi hote hain
saare manzar kahan lubhate hain
vo jo rahte hain be-havas aksar
hadson ko vahi bulate hain
koi ustad kya sikha.ega
jo sabaq sanehe sikhate hain
jab vo milne se kuchh gurez kare
vahime dil men kasmasate hain
saari yaden to ḳhush-gavar nahin
talḳh lamhe bhi yaad aate hain
dil men hota hai vajd ka aalam
taan vo dal se jab lagate hain
yaad ik hiir ki satati hai
bansuri jab kabhi bajate hain
naghme gaate the jo masarrat ke
aaj kal marsiye sunate hain
baat ki baat hi ise kahiye
qahqahe dard-o-gham miTate hain
kam hi ab rah ga.e hain jo ‘rashid’
dard ki mahfilen sajate hain
Leave a Reply