rahguzar rahguzar se pūchh liyā
terā ghar sab ke ghar se pūchh liyā
jo zabāñ se na kar sake vo bayāñ
ham ne un kī nazar se pūchh liyā
gumrahī aur baḌh ga.ī apnī
rāsta rāhbar se pūchh liyā
jab zamīñ ne diyā na terā patā
ham ne shams o qamar se pūchh liyā
tum na aao na aa.egī raunaq
ham ne dīvār-o-dar se pūchh liyā
merī chup ko vo kyā samajhte haiñ
raaz jab chashm-e-tar se pūchh liyā
ilm kā raaz ‘arsh’ bas ye hai
kuchh idhar kuchh udhar se pūchh liyā