Kho baiThi Hai Sare KHad-O-Khaal Apni Ye Duniya

Farhan Salim

kho baiThi hai saare ḳhad-o-ḳhal apni ye duniya

ab to hai faqat ek dhamal apni ye duniya

sadiyon ki sitam-dida gham-o-ranj se ma.amur

kis darja hai zaḳhmon se niDhal apni ye duniya

zor-avari-e-zulm hai is darja ki qatil

kahte hain ki hai un ka manal apni ye duniya

kab tak ye tira husn-e-taghaful hai ḳhuda-ya

ik la.ib hai bar-dast-e-majal apni ye duniya

ḳhun-rezi-e-adam ka ye aalam hai ki ab to

lagti hai bas ik gah-e-qital apni ye duniya

kyuun ḳhun-e-bashar ḳhun-e-tamanna hai har ik samt

kyuun ḳhuun se hui jaati hai laal apni ye duniya

hai ḳhaar ki manind miri ruuh men paivast

ye nish-e-gham-o-dard ḳhayal apni ye duniya

manind-e-salib is ko liye phirta huun din raat

kandhon pe uTha.e ye vabal apni ye duniya

ab mujh se sambhalti nahin ye dard ki saughat

le tujh ko mubarak ho sambhal apni ye duniya