din utarte hi na.i shaam pahan leta huun
main tiri yadon ka ehram pahan leta huun
mere ghar vaale bhi taklif men aa jaate hain
main jo kuchh der ko aram pahan leta huun
raat ko oḌh ke so jaata huun din-bhar ki thakan
sub.h ko phir se ka.i kaam pahan leta huun
jab bhi pardes men yaad aata hai ghar ka naqsha
main tasavvur men dar-o-bam pahan leta huun
ek chandi ki anguThi ke havale se faqat
apni ungli men tira naam pahan leta huun
‘faiz’ yuun rakhta huun main us ki mohabbat ka bharam
us ke hisse ke bhi ilzam pahan leta huun
Leave a Reply