Ghulam Murtaza Rahi
jhalakti hai miri ankhon men bedari si koi
dabi hai jaise ḳhakistar men chingari si koi
taḌapta tilmilata rahta huun dariya ki manind
paḌi hai zarb ehsasat par kaari si koi
na jaane qaid men huun ya hifazat men kisi ki
khinchi hai har taraf ik chaar divari si koi
kisi bhi moḌ se mera guzar mushkil nahin hai
mire pairon tale rahti hai hamvari si koi
guman hone laga jab se mujhe qad-avari ka
chala karti hai mere paanv par aari si koi
kisi mahfil kisi tanha.i men rukna hai mushkil
mujhe khinche liye jaati hai be-zari si koi
Leave a Reply