dosh-e-hava pe tinkon ka ye ashiyana kya
jis ko ujaḌ hi jaana hai vo ghar basana kya
ham ko chhupa rahe ho ye aḳhir hamin se kyuun
ham se mila rahe ho hamen gha.ebana kya
ham kaun juzv-e-ḳhas kisi dastan ke the
kaisa hamara zikr hamara fasana kya
ankhon men ashk rok liye is ḳhayal se
miTTi men motiyon ka luTa.en ḳhazana kya
vo bazm-e-dostan na vo ab ku-e-dilbaran
bahar nikal ke ghar se kahin aana jaana kya
maqsad ye kya nahin hai ki dushman ko ho shikast
ye jang ho rahi hai koi dostana kya
jab sab yahan ḳhamosh hain divar ki tarah
phir sunna kya kisi se kisi ko sunana kya
‘mohsin’ kahin bhi le ke hamen ab-o-dana jaa.e
apna yahan pe Thaur koi kya Thikana kya
Leave a Reply