jo vo nazar basar-e-lutf aam ho jaae
ajab nahin ki hamara bhi kaam ho jaae
sharab-e-shauq ki qimat hai naqd-e-jan-e-aziz
agar ye bais-e-kaif-e-davam ho jaae
rahin-e-yas rahen ahl-e-arzu kab tak
kabhi to aap ka darbar aam ho jaae
jo aur kuchh ho tiri diid ke siva manzur
to mujh pe khvahish-e-jannat haram ho jaae
vo duur hi se hamen dekh len yahi hai bahut
magar qubul hamara salam ho jaae
agar vo husn-e-dil-ara kabhi ho jalva farosh
farogh-e-nur men gum zarf-e-bam ho jaae
suna hai bar-sar-e-bakhshish hai aaj piir mughan
hamen bhi kaash ata koi jaam ho jaae
tire karam pe hai mauquf kamrani-e-shauq
ye na-tamam ilahi tamam ho jaae
sitam ke baad karam hai jafa ke baad ata
hamen hai bas jo yahi iltizam ho jaae
ata ho soz vo ya rab junun-e-‘hasrat’ ko
ki jis se pukhta ye sauda-e-kham ho jaae
Leave a Reply