tha bahut be-dard lekin hausla deta raha
vo mujhe har shab na.e ghar ka pata deta raha
main use DhunDa kiya jismon ki jannat men magar
vo mujhe ḳhvabon men milne ki saza deta raha
kab use rukne ki fursat thi ghurur-e-husn men
main ta.aqub men ravan tha main sada deta raha
jal raha tha ḳhud hi be-ma.egi ki aag men
main isi daman se sho.alon ko hava deta raha
garche mohlik tha magar insaf ki ummid par
muddaton ik zaḳhm qatil ko sada deta raha
main to is ki justuju men tha guzar aaya magar
dasht-e-mazi der tak bu-e-vafa deta raha
sab se pichhe rah gaya huun ‘arsh’ yuun is dasht men
main safar men har kisi ko rasta deta raha
Leave a Reply