Hasan Naim
gaya vo ḳhvab-e-haqiqat ko ru-ba-ru kar ke
bahut udaas huun main un se guftugu kar ke
abhi na chhoḌ qaba-e-umid ka daman
abhi to zaḳhm chhupa chak-e-dil rafu kar ke
karo na dafn ki maqtal ka naam uncha ho
liTa do ḳhaak pe lashe ko qibla-ru kar ke
unhin men mah-sifat bhi hain mehr-asa bhi
mile hain daagh ka.i un ki aarzu kar ke
uTho ‘na.im’ ki bagh-e-adam se ho aa.en
vahin ga.e hain ‘tapish’ dil ko yuun lahu kar ke
Leave a Reply