Sarfraz Zahid
do ankhon se kam se kam ik manzar men
dekhun rang-o-nur baham ik manzar men
apni khoj men sargardan be-samt hujum
tanha.i deti hai janam ik manzar men
titli ko ruḳhsar pe baiTha chhoḌ aa.e
hairat ko darkar the ham ik manzar men
lamha lamha bharte jaa.en ḳhauf ka rang
gahri shaam aur tez qadam ik manzar men
ghaat men baiTha koi danish-var mujh ko
gar deta hai roz raqam ik manzar men
ab jo apna saaya DhunDhta phirta hai
ja nikle the bhuul ke ham ik manzar men
Leave a Reply