Qurban Aatish
vo nur-e-sub.h-e-tilismi hamare ghar men gira
andhera aur ghana kasa-e-sahar men gira
ye raushni ki virasat ḳharidta kaise
hamesha sikka-e-shab hi mire khanDar men gira
main us ko DhunD raha huun magar pata hi nahin
kahan ye zad-e-safar garmi-e-safar men gira
na jaane kaun sa suraj dahak raha hai yahan
nafas se jis ke hara peḌ dopahar men gira
andhera chha gaya har samt daf.atan ‘atish’
sharar-e-sang sar-e-ḳhitta-e-nazar men gira
Leave a Reply