jab ho chuki sharab to main mast mar gaya
shishe ke ḳhali hote hi paimana bhar gaya
ne qasid-e-ḳhayal na paik-e-nazar gaya
un tak main apni aap hi le kar ḳhabar gaya
ruh-e-ruvan-o-jism ki surat main kya kahun
jhonka hava ka tha idhar aaya udhar gaya
tufan-e-nuh is men ho ya shor-e-hashr ho
hota jo kuchh hai hoga jo guzra guzar gaya
samjha hai haq ko apne hi janib har ek shaḳhs
ye chand us ke saath chala jo jidhar gaya
shoridgi se meri yahan tak vo tang the
ruTha jo main to ḳhair mana.i ki shar gaya
main ne bhi ankhen dekhi hain pariyon ki jaao bhi
tum ne dikha.i aankh mujhe aur main Dar gaya
guzra jahan se main to kaha sun ke yaar ne
qissa gaya fasad gaya dard-e-sar gaya
kaghaz siyah karte ho kis ke liye ‘nasim’
aaya javab-e-ḳhat tumhen aur nama-bar gaya
Leave a Reply