rahe na ghar ke hue ḳhvar ye to hona tha
tiri talash men ai yaar ye to hona tha
qatar jalte charaghon ki bar-sar-e-divar
siyahiyan pas-e-divar ye to hona tha
zamin banTne valon ke ham muḳhalif the
hamin pe aa giri talvar ye to hona tha
guzar ke ik rah-e-pur-ḳhar se yahan pahunche
yahan se phir rah-e-pur-ḳhar ye to hona tha
ufuq se puchh rahe hain kahan gaya suraj
hue the der se bedar ye to hona tha
hamin ne us ke liye raste bana.e the
ki ghar tak aa gaya bazar ye to hona tha
ta.alluqat ki ta.amir men ḳhulus tha kam
buland-tar hui divar ye to hona tha
Leave a Reply