koi rutba to koi nam-nasab puchhta hai
ab jahan men koi kirdar ka kab puchhta hai
tu ne kis darja nibhaya hai parastish ka nizam
chahe puchhe na kabhi koi vo rab puchhta hai
chhin leta hai vo pahle miri ḳhushiyon ki vaj.h
aur phir mujh se mire gham ka sabab puchhta hai
siskiyan ghol ke ashkon ko nigalne ka hunar
maano mat maano har ik jashn-e-tarab puchhta hai
vo javabon men bhale de na sake koi javab
par savalon pe savalat ghazab puchhta hai
saari duniya ki sunata hai mujhe mere siva
aur phir haal mira chhoḌ ke sab puchhta hai
huun vo lachar sitam jis ko dua.en DhunDen
huun vo bimar maraz jis ko matab puchhta hai
puchh leta hai dil-o-zehn ki saari baten
puchhne vaali magar baat vo kab puchhta hai
pas-e-ghairat hai na ‘nayab’ ana ka hai lihaz
chal nikalta huun mira naam vo jab puchhta hai
Leave a Reply